کوٹلی۔23جولائی(اے پی پی)وزیراعظم عمران خان آزاد کمشیر اچ ݙو ریفرنڈم کراوݨ دا اشارہ ݙیندے آکھیے جو کشمیریاں کوں حق خود ارادیت اقوام متحدہ ݙتے جیکوں او ضرور استعمال کریسن، ایں سانڳے ہک ریفرنڈم اچ کشمیری پاکستان یا بھارت نال رہݨ دا فیصلہ کریسن، ٻئے اچ او پاکستان نال الحاق یا آزاد راہݨ دا فیصلہ کریسن، نوازشریف آپݨا بیرون ملک ترکہ بچاوݨ کیتے مودی دی ٹیک ڳھدی رہین، پیپلزپارڑی مشرف معاہدہ مغربی طاقتاں کرایا ہا۔ اے ڳالھ انہاں آزاد کشمیر دے علاقے کوٹلی اچ انتخابی جلسے نال خطاب کریندے آکھی۔ انہاں آکھیا جو 25 جولائی کوں آزاد کشمیر اچ تبدیلی آسی اتے تحریک انصاف الیکشن جت تے حکومت ٻݨیسی، آزاد کشمیر اچ غربت مکیسوں، ہر خاندان دے اڳواݨ کوں صحت بیمہ، احساس اتے کامیب جوان پروگرام اچ شمولیت، مختلف شعبیاں اچ تربیت، اشیائے ضروریہ تے سبسڈی وی ݙیسوں۔ وزیراعظم آکھیا مسلم لیگ ن اتے پیپلز پارٹی ووٹ منڳن تاں اے ضرور پچھائے جو آپݨے دور اچ نوازشریف اتے زرداری آزاد کشمیر دی چنڳائی کیتے کیا چنڳاں کیتے؟ اے لوک آپݨے دور اچ کشمیر کیتے ڄڳ اچ کیا کیتے؟ انہاں کوں ملک لٹݨ اتے کرپشن دی مݙی ڳݨݨ دی فرصت ہوندی تاں کشمیر کیتے وی کڄھ کریندے، اے تاں مودی نال یاری دوستی کھیڈدے رہین اتے حریت رہنماواں نال ملݨ توں لکدے ہن۔ وزیراعظم آکھیے جو وزیراعظم آکھیے جو آپݨی حکومت ہووݨ اتے آپݨے امپائر ہووݨ دے باوجود اپوزیشن آزاد کشمیر دے انتخابات اچ ہرݨ دے ݙر توں پہلے ہی دھاندلی دا شور مچائی ودی اے، جیکر تہاکوں ہرݨ دا اتنا ہی ݙر اے تاں انتخابی اصلاحات کیتے حکومت نال کیوں نئیں ٻاھندے؟ وزیراعظم عمران خان آکھیے جو میں ہر ڄاہ تے مسئلہ کشمیر چاتے اتے تہاݙا سفیر ٻݨیاں، ڄڳ کوں ݙسائے جو کشمیر اچ کیا ظلم تھیندا پئے، پورا پاکستان تہاݙے نال اے، کشمیریاں کوں او حق ضرور ملسی جیندے کیتے او قربانیاں ݙیندے پین۔ جلسے نال وفاقی وزیر امور کشمیر و گلگت بلتستان علی امین گنڈاپور وی خطاب کیتے۔
.jpg)
