اسلام آباد۔21مارچ (اے پی پی) وزیر خارجہ شاہ محمود قریشی نال چینی ہم منصب وانگ ای دی وفد دے رلے سنوار کوں ملاقات کیتی۔ ݙوہیں وزرائے خارجہ ݙو پاسہ تعلقات دی اڄوکی رفتار برقرار رکھݨ اتے آپسی دلچسپی کوں ٻیا ودھاوݨ دا عزم کیتا۔ دفتر خارجہ دے ترجمان دے مطابق ملاقات اچ ݙوہیں وزارئے خارجہ ݙو پاسہ سٹریٹجک، اقتصادی اتے سکیورٹی تعاون، کوویڈ 19، یوکرین اچ جاری صورتحال اتے آپسی دلچسپی دے علاقائی اتے بین الاقوامی معاملیاں تے ڳالھ مہاڑ کیتی۔ شاہ محمود قریشی آکھیا جو اے چین پاکستان دوستی کیتے ٻہوں اہم ݙینھ اے، اے موقع ایں کیتے وی اہم اے جو چینی وزیرخارجہ پہلی واری او آئی سی وزراء خارجہ کونسل دے اجلاس اچ شریک تھیندے پئن۔ وزیرخارجہ ایں موقع تے پاکستان دی قیادت اتے عوام ولوں سنوار کوں تھویݨ آلے المناک ہوائی حادثے تے قیمتی جاناں دے ضیان تے چینی قیادت اتے عوام نال تعزیت کیتی۔ ݙوہیں وزرائے خارجہ وچال ݙوپاسہ ڳھاٹے تعلقات کوں ٻیا مضبوط ٻݨاوݨ بارے تفصیلی ڳالھ مہاڑ کیتی ڳئی۔ وزیر خارجہ ، چینی ہم منصب وانگ ای دی او آئی سی وزراء خارجہ کونسل دے 48 ویں اجلاس اچ شرکت اتے پاکستان دے قومی ݙینھ دی پریڈ اچ شرکت دا خیر مقدم کیتا۔ وزیر خارجہ ، ریاستی کونسلر وانگ ای کوں مقبوضہ جموں و کشمیر اچ انسانی حقوق دی سنگین خلاف ورزیاں اتے بھارت دے غیر ذمہ دارانہ رویے بارے ݙسیا۔ چینی وزیر خارجہ وانگ ای ، او آئی سی وزراء خارجہ کونسل دے 48 ویں اجلاس اچ سݙݨ تے وزیر خارجہ مخدوم شاہ محمود قریشی دا شکریہ ادا کیتا۔
.jpg)
